ကွာရှင်းပြတ်စဲခြင်း - ၁

သမီး ခါင်း ချာချာလည်နေပါပြီ။ ဒီလောက်များလှတဲ့ လူစုလူဝေးကို သမီး တခါမှ မမြင်ဘူးပါ။ တရားရုံးအဆောက်အဦရဲ့ အပြင်ဘက်မှာ လူတွေ... လူတွေ...။ ဝတ်စုံပြည့်ဝတ် ဖိုင်တွဲ ချိုင်းကြားညှပ်ထားကာ ဟိုဒီ သွားနေတဲ့လူကြီးတွေ၊ မြောက်ပိုင်းယီမင်ရိုးရာဝတ်စုံနဲ့ လူကြီးတွေ၊ ဘာစကားပြောနေမှန်းကို ခန့်မှန်းလို့မရလောက်အောင် တယောက်နဲ့တယောက် အော်ဟစ်ပြောဆိုနေကြတဲ့ အမျိုးသမီးတွေ သူတို့တွေကြားမှာ သမီးရဲ့ တည်ရှိမှုက ပျောက်လို့နေသည်။ တယောက်မှ သတိမထားမိလောက်အောင် သူတို့တွေအတွက် သမီးက သေးသွယ် သိမ်ငယ်လွန်းလှသည်။ တကယ်တော့လည်း သမီးအသက် ၁၀နှစ်ပဲ ရှိပါသေးတယ်။ ဒါမှမဟုတ် ၉နှစ်များလား...။  အင်းးးး ဘယ်သူအမှန်သိနိုင်မှာလဲလေ။


လူတွေပြောကြတာက တရားသူကြီးဆိုတာ လိုအပ်နေသူတွေ၊ ဒုက္ခရောက်နေသူတွေကို ကူညီတဲ့သူကို ခေါ်တာတဲ့။ အဲ့ဒါဆိုရင်တော့ အခု သမီး လိုက်ရှာရမှာ တရားသူကြီးတယောက်ပေါ့။  သမီး အကြောင်းကိုပြောပြဖို့အတွက်လေ။ 


တကယ်တော့ သမီး အရမ်း ပင်ပန်းနေပါပြီ။ မျက်နှာကာ ကလည်း ပူလိုက်တာ။ ခေါင်းကလည်းကိုက်။ အဲ့ဒါတွေထက် ဆိုးတဲ့ ခံစားချက်က... ရှက်ရွံ့မှု။


အဖြူအမဲ ဝတ်စုံဝတ်ထားတဲ့ လူကြီးတယောက် သမီးဆီလျောက်လာနေတာ တွေ့ရသည်။ တရားသူကြီးများလား။ ဒါမှမဟုတ်... ရှေ့နေလား။

"ကျေးဇူးပြု၍... ဦးလေးကြီးရှင့်..  သမီး တရားသူကြီးနဲ့တွေ့ချင်ပါတယ်.."


"ဟိုမှာတွေ့လား၊ အဲ့ဒီလှေကားတွေအတိုင်း တက်သွားလိုက်.."


ပြောပြောသွားသွားနဲ့ပဲ သမီး ကိုတောင် သေချာမကြည့်အားပဲ လူအုပ်ကြီးထဲ ပြန်လည်ဝင်ရောက် ပျောက်ကွယ်သွားပါတော့တယ်။ မာဘယ်ကျောက်ကြမ်းပြင်ပေါ်  ခြေချမိလိုက်တဲ့ခဏမှာပဲ ခြေလှမ်းတွေရဲ့ခေါ်ဆောင်ရာနောက်ကို သမီး ကောက်ကောက်ပါသွားတော့တယ်။ တနေရာမှာ ချောင်းကြည့်လိုက်တော့ တူညီဝတ်စုံဝတ်ထားတဲ့ လူတစုကို တွေ့ရတယ်။ သူတို့ သမီးကိုမြင်ရင် ဖမ်းမှာပဲ။ အရွယ်မရောက်သေးတဲ့ အိမ်ပြေးကလေးတယောက်အနေနဲ့ပေါ့။ 

တုန်တုန်လှုပ်လှုပ်နဲ့ပဲ ပထမဆုံးတွေ့တဲ့ အမျိုးသမီးတယောက်ကို

"သမီး တရားသူကြီးနဲ့ စကားပြောချင်ပါတယ်.. "  လို့ မဝံ့မရဲနဲ့ပြောလိုက်တယ်။ မျက်ဝန်းနက်နက်ကြီးတွေနဲ့ တအံ့တသြစိုက်ကြည့်နေပြီးမှ -

"ဘယ်တရားသူကြီးကို တွေ့ချင်တာလဲ.."

"ဘယ်သူဖြစ်ဖြစ်ပါ.. တရားသူကြီးတယောက်ယောက်ဆီကို သမီးကို ခေါ်သွားပေးပါ.."


နောက်ထပ်တကြိမ် အံ့သြစွာနဲ့ စိုက်ကြည့်နေပြီး.. နောက်ဆုံး-

"လာ.. လိုက်ခဲ့.."


အခန်းတံခါးပွင့်သွားတဲ့အခါ ခန်းလုံးပြည့်နီးပါး လူအုပ်ကြီးရဲ့ အဆုံး၊ စားပွဲတလုံးရဲ့ နောက်ဖက်မှာ နှုတ်ခမ်းမွှေးနဲ့ မျက်နှာသွယ်သွယ် လူတယောက်ကို တွေ့ပါတယ်။ တရားသူကြီးပဲပေါ့။ ထိုင်ချလိုက်ရင်းမှ ထိုင်ခုံနောက်ကိုခေါင်းမှီလိုက်ပြီး သမီးအလှည့်ရောက်ဖို့ကို နားနေရင်းနဲ့ စောင့်နေလိုက်တော့တယ်။


"ငါဘာလုပ်ပေးရမလဲ ကလေးမ.."   ဆိုတဲ့ အသံက သမီးကို လှုပ်နှိုးလိုက်ပါတယ်။ တကယ်တော့  နူးနူးညံ့ညံ့ မေးလိုက်တာပါပဲ။ သမီး မျက်နှာကိုပွတ်သုတ်လိုက်ရင်းနဲ့မှ သမီးရှေ့မှာရပ်နေသူဟာ နှုတ်ခမ်းမွှေးနဲ့ တရားသူကြီးမှန်း သတိရလိုက်တယ်။ တခန်းလုံးလည်း လူကုန်လုနီးနီး ရှိနေပါပြီ။ 


"သမီး... ကွာရှင်းချင်လို့ပါ.."

(ဆက်ရန်)